Pas vendimit të marrë nga Komiteti i Përfaqësuesve të Përhershëm të Shteteve Anëtare të Bashkimit Evropian (COREPER), Shqipëria hyn zyrtarisht në fazën e mbylljes së negociatave për anëtarësim. Ky zhvillim do të formalizohet në Konferencën e 8-të Ndërqeveritare, e cila do të zhvillohet më 26 maj 2026 në Bruksel.
Vendimi vjen pas konfirmimit të plotësimit të kushteve të ndërmjetme në grupkapitullin "Themelorët". Kjo fazë vendimtare përfshin përcaktimin e kritereve për mbylljen e negociatave për dy kapituj thelbësorë:
• Kapitulli 23: "Gjyqësori dhe të Drejtat Themelore"
• Kapitulli 24: "Drejtësia, Liria dhe Siguria"
Sipas Agjencisë për Media dhe Informim, ky vendim vlerëson progresin e qëndrueshëm të vendit në forcimin e shtetit të së drejtës, konsolidimin e reformës në drejtësi, si dhe luftën kundër korrupsionit dhe krimit të organizuar. Gjithashtu, është vlerësuar angazhimi për të drejtat e njeriut, lirinë e shprehjes, të drejtën e pronës dhe barazinë në përputhje me standardet e Bashkimit Evropian.
Në tryezën e negociatave, krahas grupkapitullit të themelorëve, pritet të trajtohen edhe çështje që lidhen me prokurimin publik, statistikat dhe kontrollin financiar. Shqipëria konfirmon vendosmërinë për të vazhduar reformat transformuese me qëllim plotësimin e kritereve për anëtarësim brenda kësaj dekade.