Ambasadorët e 27 vendeve anëtare të Bashkimit Europian kanë miratuar draftin e përkohshëm të EUCP-së dhe kanë konfirmuar mbajtjen e Konferencës Ndërqeveritare më 26 maj 2026 në Bruksel, në orën 19:00.
Takimi i tetë i Konferencës së Anëtarësimit me Shqipërinë do të shërbejë për të konfirmuar përmbushjen e standardeve të ndërmjetme dhe për të vendosur standardet përmbyllëse për Grupkapitullin e parë “Bazat”. Ky grup përfshin funksionimin e institucioneve demokratike, reformën e administratës publike, kriteret ekonomike, si dhe çështjet e gjyqësorit dhe të drejtave themelore.
Raporti i BE-së pranon se Shqipëria ka konsoliduar institucionet demokratike dhe ka kuadër ligjor për zgjedhje demokratike, por kërkon përmirësime në legjislacionin zgjedhor, transparencën parlamentare dhe lirinë e medias. Vlerësohet bashkëpunimi me Europol dhe Frontex, ndërsa kërkohet rritje e rezultateve në luftën kundër krimit të organizuar, trafikut të drogës dhe pastrimit të parave.
Sipas vendeve anëtare, Shqipëria ndodhet “në rrugën e duhur” për t’u bërë ekonomi funksionale tregu, megjithëse problemet me informalitetin, pronat dhe administratën publike vazhdojnë të pengojnë zhvillimin.