Kryeministri i Shqipërisë, Edi Rama, ka njoftuar se më 14 korrik do të zhvillohet Konferenca e 9-të Ndërqeveritare Shqipëri-BE. Në mbledhjen që do të mbahet në Bruksel, vendi ynë pritet të mbyllë zyrtarisht tre kapitujt e parë të negociatave për anëtarësim.
Bëhet fjalë për kapitujt e mëposhtëm, të cilët janë konsideruar të njësuar me standardet evropiane:
- Kapitulli 25: Shkenca dhe kërkimi
- Kapitulli 26: Arsimi dhe kultura
- Kapitulli 30: Marrëdhëniet me jashtë
Përmes një postimi në rrjetet sociale, kryeministri Rama reagoi ndaj deklaratave të opozitës, të cilat flisnin për një bllokim të negociatave, anulim të Samitit të NATO-s apo rrëzim të qeverisë. Duke ironizuar këto pretendime, Rama theksoi se "puna e tyre janë llafet, ndërsa fjala jonë është puna".
Përditësime
Grupi i punës për zgjerimin (COELA) miratoi mbylljen e 3 kapitujve të parë të negociatave përpara takimit zyrtar. Vendimi ka kaluar tashmë për miratim në mbledhjen e ambasadorëve të vendeve anëtare të BE-së. Konferenca ndërqeveritare në Bruksel është konfirmuar për të martën, më 14 korrik, në orën 19:00. Kryeministri Edi Rama vendosi si objektiv përmbylljen e të gjithë 33 kapitujve të negociatave brenda fundit të vitit të ardhshëm.