Ministrja e Ekonomisë dhe Inovacionit, Delina Ibrahimaj, ka hapur zyrtarisht në Tiranë aktivitetin për kryesimin e Shqipërisë në CEFTA për vitin 2026. Ajo e cilësoi këtë mandat si stacion vendimtar drejt anëtarësimit në tregun unik europian.
Gjatë fjalës së mbajtur në ceremoni, ministrja theksoi se ky kryesim, që përkon me 20-vjetorin e organizatës, synon kthimin e bashkëpunimit rajonal në rezultate konkrete për bizneset. Objektivi kryesor është rritja e eksporteve dhe lehtësimi i tregtisë përmes eliminimit të barrierave burokratike në kufi.
Fokusi i Shqipërisë do të përqendrohet në reduktimin e kohës dhe kostove të transportit me korridore të gjelbra dhe digjitalizim të plotë të procedurave, duke aplikuar sisteme pa letra. Do të punohet gjithashtu për njohjen reciproke të standardeve dhe certifikimeve, si dhe harmonizimin e tyre me ato të BE-së, për të hapur rrugë prodhimeve shqiptare drejt tregut europian.
Sipas të dhënave të cituara, shkëmbimet tregtare me vendet e CEFTA-s gjatë 2025 kapën vlerën 123 miliardë lekë, me bilanc pozitiv për Shqipërinë. Kosova mbetet partneri kryesor për eksportet, ndërsa Serbia për importet. Sektorët kryesorë të eksporteve përfshijnë energjinë, materialet e ndërtimit dhe produktet agro-ushqimore.
Për të adresuar sfidat si rënia e vlerës së eksporteve, kryesimi do të forcojë koordinimin institucional dhe përfshirjen e sektorit privat. Drejtoresha e CEFTA-s, Pranvera Kastrati, vuri në dukje se digjitalizimi ka kursyer vite pritjeje në kufi për mijëra kamionë.
Ministrja Ibrahimaj deklaroi se suksesi do të matet me rritjen e konkurrueshmërisë së bizneseve shqiptare në arenën ndërkombëtare.