Qeveria shqiptare ka lidhur një kontratë me vlerë 15 milionë euro për blerjen e tre avionëve të destinuar për shuarjen e zjarreve. Pavarësisht se tenderi i zhvilluar nga Ministria e Mbrojtjes është klasifikuar si sekret, dokumentet zyrtare tregojnë se fituese është shpallur kompania spanjolle Air Tractor SRL, e cila zotërohet nga shtetasi spanjoll Vincente Huerta.
Sipas vendimeve gjyqësore, Air Tractor SRL dhe grupi i kompanive që ajo kontrollon, ndër të cilat edhe Titan Firefighting, kanë qenë të përfshira në një kartel që ka manipuluar tenderat publikë për blerjen e avionëve të zjarrit në vende si Spanja, Italia, Portugalia, Franca dhe Qiproja. Kjo veprimtari korruptive, që besohet se ka shkaktuar një dëm mbi 150 milionë euro, ka çuar në dënime me burg për ish-drejtuesit e grupit dhe ndalimin e pjesëmarrjes së kompanisë në tendera për 9 muaj.
Në vitin 2024, Ministria greke e Mbrojtjes Civile hapi një tender me vlerë 154.8 milionë euro për blerjen e 25 avionëve, ku Air Tractor SRL u shpall fillimisht fituese. Megjithatë, procesi u anulua pasi Gjykata Supreme e Greqisë e shpalli ofertën të papranueshme, për shkak se kompania kishte fshehur dënimet e saj në Spanjë. Ky vendim i gjykatës greke, sipas burimeve, praktikisht e pamundëson pjesëmarrjen e këtij subjekti në tenderat publikë brenda hapësirës së Bashkimit Europian.
Kompania, e njohur më parë me emrin Avialsa-T, ndryshoi strukturën dhe emërtimin pas skandaleve të vitit 2014, por praktikat e saj mbetën në qendër të hetimeve gjyqësore. Aktualisht, qeveria shqiptare po përballet me kritika mbi këtë proces, teksa vendi po përjeton periudha me vatra të shumta zjarri në territorin e tij.