Shqipëria ka shënuar ditën më të nxehtë të vitit gjatë kësaj të hëne, për shkak të valës përvëluese që ka përfshirë territorin. Sipas të dhënave meteorologjike, temperaturat në Tiranë kanë arritur në 45 gradë në diell.
Vlerat më të larta janë regjistruar në qarkun e Beratit, ku termometri shënoi 47 gradë në diell dhe 42 gradë në hije. Sipas parashikimeve, dita e martë do të sjellë një rënie të lehtë të temperaturave, por efekti i tyre do të mbetet i lartë për shkak të lagështirës në ajër.
Përmirësimi i kushteve atmosferike dhe rënia e temperaturave pritet të jenë më të theksuara duke nisur nga e premtja, ditë kur vendi parashikohet të përfshihet edhe nga rrebeshe shiu. Megjithatë, meteorologët theksojnë se kjo periudhë freskie do të jetë kalimtare, pasi Shqipëria pritet të përballet sërish me një tjetër valë të të nxehtit afrikan.
Ekspertët lidhin këto fenomene të përsëritura dhe rritjen e temperaturave gjatë ditëve dhe netëve me ndryshimet klimatike që po ndikojnë vendin.