Në mjediset e “Shtëpisë së Futbollit” u prezantua sot raporti “UEFA Grow Market Research”, një analizë e realizuar nga UEFA në bashkëpunim me agjencinë Nielsen Sport. Ky studim shqyrtoi perceptimin, zhvillimin dhe ndikimin e futbollit në shoqërinë shqiptare, duke ofruar të dhëna krahasuese për periudhën 2016-2026.
Sipas të dhënave, 41% e fëmijëve dhe 34% e të rriturve në Shqipëri janë aktivisht të përfshirë në praktikimin e futbollit. Raporti thekson gjithashtu rritjen e interesit për ekipin kombëtar, i cili nga 61% në vitin 2016, ka arritur në 66% aktualisht.
Presidenti i Federatës Shqiptare të Futbollit, Armand Duka, vuri në dukje se këto rezultate reflektojnë investimet në infrastrukturë dhe zbatimin e projekteve si “Uniforma Ime” dhe “Topi Im”. Sipas tij, këto të dhëna shërbejnë si një mekanizëm orientues për të përcaktuar prioritetet dhe për të rritur më tej atraktivitetin e futbollit në vend.
Studimi evidenton se futbolli në Shqipëri është integruar si një pjesë thelbësore e jetës së qytetarëve, duke u pozicionuar si sporti më i praktikuar në vend.