Federata Shqiptare e Futbollit do të mirëpresë në muajin qershor raundin e dytë të ndeshjeve të ekipit kombëtar U-17. Ndeshjet do të zhvillohen në vendin tonë nën organizimin e FSHF-së dhe UEFA-s.
Ekipi kuqezi është shortuar në Grupin B6, së bashku me Letoninë U-17 dhe Ukrainën U-17. Takimet do të luahen më 3, 6 dhe 9 qershor në Egnatia Arena.
Këto përballje kanë rëndësi për renditjen që përcakton pozicionimin e ekipeve në kualifikueset e ardhshme të Kampionatit Europian U-19 2028. Sipas rregullores së UEFA-s, skuadrat që renditen të parat në grupet e Ligës B sigurojnë ngjitjen në Ligën A për raundin e parë të kualifikueseve të Europianit U-19.
Ky raund lidhet drejtpërdrejt me të njëjtën gjeneratë lojtarësh. Futbollistët që luajnë aktualisht me ekipin U-17 do të kalojnë më pas te ekipi U-19. Një vend i parë në grup do t’i jepte Shqipërisë mundësinë të garonte me ekipet më të forta europiane në ciklin kualifikues të Euro U-19 2028.