Skuadra kombëtare e Shqipërisë U-19 e vajzave barazoi me rezultatin 2-2 ndaj Malit të Zi në ndeshjen e parë të raundit të dytë të kualifikuesve të Kampionatit Europian U-19 për vajza. Takimi u zhvillua pasditen e 9 prillit 2026 në Shtëpinë e Futbollit në Tiranë dhe u drejtua nga trajnerja Daniela Kodra.
Trajnerja Kodra e nisi ndeshjen me formacionin: Helshani (GK), Hysa, Nika, Kadiolli, Bajramaj, Vata, Bushati, Ago (C), Stalaj, Reci dhe Leka.
Në pjesën e parë, Mali i Zi kaloi në avantazh me golin e Dresaj në minutën 29. Kuqezinat krijuan raste, por nuk arritën të shënonin.
Në pjesën e dytë, Shqipëria dominoi lojën. Gelda Kadiolli barazoi në minutën 72 me një gol direkt nga goditja e këndit. Bora Bushati përmbyste rezultatin në minutën 90 me goditje nga distanca, duke çuar shifrat në 2-1. Mali i Zi barazoi dy minuta më vonë në minutat shtesë, duke mbyllur ndeshjen 2-2.
Në ndeshjen tjetër të Grupit 5, të luajtur në Egnatia Arena, Turqia mundi Lihtenshtejnin me 6-0 dhe kryeson me tre pikë. Shqipëria dhe Mali i Zi ndajnë vendet e dytë dhe të tretë me nga një pikë.
Shqipëria do të ketë përballë Turqinë më 12 prill në orën 15:00 në Shtëpinë e Futbollit. Takimi transmetohet drejtpërdrejt në FSHF TV. Vendi i parë në grup kalon në Ligën A, ndërsa kualifikimi në turneun final të Evropianit, që zhvillohet në Bosnjë-Hercegovinë, nuk është i mundur nga Liga B.