Kombëtarja shqiptare e futbollit për grupmoshën U-19 ka arritur një fitore në ndeshjen e parë miqësore kundër Lituanisë, e cila u zhvillua në stadiumin e Vorës. Nën drejtimin e trajnerit Fatjon Tafaj, kuqezinjtë treguan karakter duke përmbysur rezultatin në minutat e fundit të takimit.
Formacioni titullar i Shqipërisë ishte: Raffaele Huli në portë, Kris Gecaj (kapiten), Leon Sylejmani, Spasian Nasto, Dion Vata, Andreas Llana, Serxho Vogli, Rikardo Sheji, Oliver Blini, Alen Vukaj dhe Grei Kuqi.
Pjesa e parë nisi në favor të Shqipërisë, e cila kaloi në avantazh në minutën e 18-të me anë të Oliver Blinit. Megjithatë, pas pushimit, përfaqësuesja e Lituanisë reagoi duke shënuar dy gola dhe duke përmbysur përkohësisht rezultatin. Shqipëria nuk u dorëzua dhe në minutën e 90-të barazoi shifrat falë një autogoli të mbrojtësit lituanez Jokubas Ziedelis.
Fitorja u vulos pak çaste më vonë, kur Armend Muslika fitoi një penallti pas një depërtimi në zonën e rreptësisë. Ai e mori përsipër ekzekutimin e 11-metërshit, duke qenë i saktë dhe duke shënuar golin e tretë për Shqipërinë. Të dyja përfaqësueset do të përballen sërish në ndeshjen e radhës miqësore, e cila është planifikuar të zhvillohet më 2 tetor në orën 15:30, po në stadiumin e Vorës.