Një shtetas shqiptar 28-vjeçar ka humbur jetën në qytetin e Leicesterit në Britaninë e Madhe, në rrethana që po hetohen nga autoritetet vendëse si vrasje. Viktima është identifikuar zyrtarisht nga Policia e Leicestershire si Ervin Lita, i cili përdorte edhe emrin Ervin Axhami.
Ngjarja është raportuar rreth orës 06:58 të mëngjesit të së dielës, kur shërbimet e urgjencës së Ambulancës së East Midlands e gjetën të riun me plagë të rënda në Compton Road. Pavarësisht ndërhyrjes së ekipeve mjekësore për t'i dhënë ndihmën e parë, 28-vjeçari u shpall i vdekur në vendngjarje.
Në kuadër të veprimeve hetimore, autoritetet britanike vunë në pranga dy persona të moshës 36 dhe 27 vjeç, si të dyshuar për përfshirje në këtë ngjarje. Sipas njoftimeve të policisë, të dyshuarit, të cilët janë banues në Leicester, janë liruar përkohësisht me kusht, ndërsa procesi hetimor vijon për zbardhjen e rrethanave të plota. Hetuesit janë duke analizuar pamjet e kamerave të sigurisë, provat mjeko-ligjore dhe dëshmitë për të përcaktuar shkakun e vdekjes dhe përfshirjen e mundshme të personave të tjerë në rast.
Përditësime
Policia ka lançuar një portal online për mbledhjen e provave lidhur me vdekjen e 28-vjeçarit shqiptar në Leicester. Inspektor Kevin Hames theksoi se ekipi hetimor po punon maksimalisht për zbardhjen e ngjarjes, duke u bërë thirrje qytetarëve që të dorëzojnë çdo regjistrim nga kamerat e sigurisë ose ato të automjeteve (dashcam).