Detyrimet financiare të shtetit shqiptar që rrjedhin nga vendimet e arbitrazheve ndërkombëtare dhe proceset gjyqësore vijojnë të mbeten në nivele të larta. Sipas të dhënave të publikuara në buxhetin faktik nga Ministria e Financave, totali i këtyre detyrimeve u raportua në 179.6 milionë euro në përfundim të vitit 2025.
Çështjet kryesore të arbitrazhit
Nga totali i detyrimeve, shuma më e madhe është e përqendruar në disa dosje të rëndësishme:
• Arbitrazhi ICSID ARB/5/28: I njohur si çështja "Hydro dhe të tjerë kundër Shqipërisë", ku shteti përballet me biznesmenin italian Francesco Becchetti. Kjo çështje përbën rreth 60 për qind të totalit, me një detyrim kontingjent prej 108.3 milionë eurosh.
• Arbitrazhi ICC Case No. 23998/MHM: Konflikti ndërmjet bashkimit të kompanive Copri-Aktor dhe Autoritetit Rrugor Shqiptar (ARRSH) lidhur me ndërtimin e rrugës Tiranë-Elbasan, me një detyrim prej 41.1 milionë eurosh.
• Arbitrazhi ICC Case No. 25414/HHM: Çështja që përfshin Constructioni Dondi S.P.A dhe kompaninë japoneze Kubota, pas ndërprerjes së kontratës për sistemin e kanalizimeve në zonën e Kasharit, me vlerë 13.3 milionë euro.
• Arbitrazhi ICC Case No. 22676/GR: Çështja GBC Oil Company LTD kundër Ministrisë së Infrastrukturës dhe Energjisë (MIE), AKBN dhe Albpetrol, me detyrim të mbetur prej 11.9 milionë eurosh.
Pagesat e kryera
Raporti financiar konfirmon se gjatë vitit 2025, shteti shqiptar ka kryer pagesa për një pjesë të proceseve gjyqësore dhe shpenzimeve ligjore. Shuma totale e likuiduar gjatë këtij viti për këto zëra ishte 1.47 milionë euro. Megjithatë, niveli i përgjithshëm i detyrimeve ka mbetur i qëndrueshëm krahasuar me vitin 2024, duke treguar mungesë të ndjeshme përparimi në zgjidhjen përfundimtare të këtyre çështjeve.