Komisioni për mbrojtjen e gjyqtarëve ka miratuar masa shtesë mbrojtjeje për gjyqtaren Irena Gjoka pas indicieve për rrezik ndaj saj. Në komision bëjnë pjesë përfaqësues nga Ministria e Brendshme, Ministria e Drejtësisë, anëtarë të Këshillit të Lartë të Gjyqtarëve, drejtuesi i Gjykatës së Posaçme Erjon Bani dhe zyrtarë të Policisë së Shtetit.
Sipas vendimit, përveç gardës që mbron zakonisht gjyqtarët dhe prokurorët e SPAK, do të angazhohen edhe oficerë nga njësia e mbrojtjes së veçantë. Të dhënat mbi kërcënimet dhe indiciet për rrezik mbahen sekret nga autoritetet për arsye sigurie.
Gjyqtarja Gjoka ka pasur mbrojtje shtetërore më parë, jo vetëm për funksionin e saj si zëvendëskryetare e Gjykatës së Posaçme, por edhe si relatore e çështjeve të rëndësishme, si dosja Partizani. Në atë periudhë, autoritetet vlerësuan se ajo ishte e rrezikuar dhe i vendosën truproja.
Ndër personat e tjerë nën mbrojtje të veçantë nga shteti përmenden:
- Gjyqtarja Gentian Muça, pasi rreth pesë vjet më parë në automjetin e saj dhe të bashkëshortit të saj, prokuror, u vendos tritol.
- Ish-gjyqtari i Shkodrës Tonin Stërkaj, në banesën e të cilit u hodhën tritol dhe autorët nuk janë identifikuar ende. Ai ka larguar familjen dhe, pavarësisht shkarkimit nga vettingu, konsiderohet ende i rrezikuar.
Shumica e të mbrojturve janë prokurorë të SPAK, si edhe tre prokurorë të Elbasanit, njëri prej të cilëve u transferua në Tiranë për arsye sigurie.