Shtetasi me origjinë shqiptare, Endi Balla, banues në Shelby Township të Miçiganit, refuzoi në momentin e fundit të deklarohej fajtor për akuzat që rëndojnë mbi të, lidhur me tentativën e rrëmbimit të një vajze 15-vjeçare në Clinton Township dhe një vajze 7-vjeçare në Sterling Heights.
Edhe pse avokati mbrojtës, Sam Bennet, kishte bërë të ditur se klienti i tij kishte pranuar marrëveshjen për pranimin e fajësisë javën e kaluar, Balla ndryshoi qëndrim pak para fillimit të seancës gjyqësore. Kur u pyet nga gjykatësi nëse dëshironte të deklarohej fajtor, ai u përgjigj shkurtimisht me "Jo", duke e dërguar çështjen drejt gjykimit.
Gjatë seancës, Balla shkaktoi tension në sallë me sjelljen e tij. Ai tentoi të komunikonte me personat e pranishëm dhe u tregoi gishtin e mesit familjarëve të dy vajzave të mitura, veprim që solli ndërhyrjen e gjykatësit dhe avokatit për të rivendosur rregullin.
Procesi gjyqësor ndaj tij është shoqëruar prej muajsh me debate mbi aftësinë mendore të të akuzuarit. Më herët gjatë vitit 2026, Balla u shpall i aftë për t’u përballur me drejtësinë, ndonëse prokuroria kishte shqyrtuar mundësinë e pretendimit për paaftësi mendore. Familjarët e viktimave kanë shprehur zhgënjim për zvarritjen e procedurave.
Endi Balla do të paraqitet sërish në gjykatë më 24 gusht për një seancë paraprake. Nëse nuk arrihet ndonjë marrëveshje e re, gjyqi është parashikuar të nisë në muajin tetor.