Gjykata e Posaçme ka shtyrë për herë të dytë seancën paraprake për ish-zëvendëskryeministrin Arben Ahmetaj në fraksionin e dosjes së inceneratorit të Elbasanit. Arsyeja ishte moskthimi i përgjigjes nga të akuzuarit në mungesë për marrjen dijeni të procesit gjyqësor.
Gjykata urdhëroi njoftimin e ri të të pandehurve në adresat përkatëse dhe caktoi datën 15 qershor për seancën e ardhshme.
Të pandehur në këtë proces janë Arben Ahmetaj, Erjola Hoxha, Albina Mançka, Mirel Mëriti, Klodian Zoti, Andi Boni, Elda Dinaj, Gerian Kuka, Helidon Begaj, Sonila Goxhaj dhe Sokol Meqemeja.
SPAK e akuzon Ahmetajn, të shpallur në kërkim që prej korrikut 2023, për korrupsion pasiv në 9 raste, pastrim parash në 5 raste dhe fshehje pasurie në 15 raste. Prokuroria përmend shpenzime të padeklaruara prej 93 500 euro në një kazino në Maltë dhe rreth 700 mijë euro të marra si ryshfet nga biznesmenët e inceneratorëve.
Dosja për inceneratorin e Elbasanit u nda si fraksion më vete nga procedura kryesore dhe u hetua nga prokurorët Altin Dumani, Enkeleda Millonai dhe Bledar Maksuti.