Silda Çepe, zëdhënësja e Partisë Socialiste për zgjedhjet e 11 majit, është emëruar drejtoreshë e IdentiTek. Ajo zëvendëson Freskida Halilaj, e cila u shkarkua nga ky post.
Çepe ka mbajtur më parë disa detyra në administratë dhe qeveri, përfshirë atë të zëvendësministres për Evropën dhe Punët e Jashtme.
Në të njëjtën kohë, ish-deputeti i Partisë Socialiste, Florenc Spaho, ka marrë drejtimin e Illyrian Guard. Spaho përfaqësoi Elbasanin si deputet që nga viti 2019, por nuk arriti të sigurojë mandatin në zgjedhjet e 11 majit të vitit të kaluar, me 3 095 vota. Më 22 korrik të këtij viti, ai u emërua drejtor i përgjithshëm i QSUT-së, por dha dorëheqjen pas dy muajsh.
Enrik Banushi është larguar nga posti i drejtuesit të Illyrian Guard, shoqërisë policore me kapital 100% shtetëror. Kjo shoqëri u themelua në vitin 2019 dhe ofron shërbime sigurie fizike për institucionet shtetërore të rëndësisë së veçantë, si dhe për biznese dhe ndërmarrje private.