Ministria e Punëve të Brendshme ka shkarkuar nga detyra drejtoreshën e IdentiTek, Freskida Halilaj.
Freskida Halilaj ka mbajtur këtë post që nga muaji nëntor 2024, pas Loina Prifti, e cila u shkarkua më parë pas një auditi për shkelje ligjore në ruajtjen e të dhënave sensitive dhe abuzim me fondet.
Ministria nuk ka bërë publike motivet zyrtare të shkarkimit. Shumë media raportojnë se motivet ende nuk dihen qartë, ndërsa 27.al pretendon abuzime me fondet gjatë mandatit të saj, duke përmendur zgjatjen e kontratës me AFIS and Biometrics Consulting Inc për 684 000 euro, tender me shkelje sipas auditimit, mungesë dokumentacioni dhe emërim të njerëzve joprofesionistë.
IdentiTek ofron regjistrimin, prodhimin dhe shpërndarjen e dokumenteve biometrike për shtetasit shqiptarë dhe të huajt me banim të përhershëm apo të përkohshëm në Shqipëri. Më parë, Freskida Halilaj ka qenë drejtoreshë shitjesh në Digicom Albania.
Sot pritet emërimi i drejtuesit të ri.
Përditësime
Silda Çepe Anagnosti u emërua drejtoreshë e re e IdentiTek, pas shkarkimit të Freskida Halilaj. Ajo ka shërbyer si zv.ministrja e Punëve të Jashtme për Evropën dhe ka mbajtur detyra të rëndësishme në administratë e qeveri.