Ministria e Mbrojtjes ka njoftuar një bilanc të situatës së zjarreve në të gjithë vendin. Sipas të dhënave, operacionet e shuarjes po zhvillohen në disa zona problematike, ku po përdoren korridore ndarëse për izolimin e flakëve dhe mbrojtjen e banesave. Përveç forcave tokësore, në terren po operojnë edhe Forcat e Armatosura, të cilat mbështesin ndërhyrjet me mjete ajrore.
Zonat kryesore ku po zhvillohen operacionet përfshijnë:
• Mali i Dajtit (Tiranë): Po ndërhyhet me 15 efektivë të MZSH, 10 forca të ADZM dhe 50 efektivë të Forcave të Armatosura, me mbështetjen e dy helikopterëve.
• Gurë-Lurë (Dibër): Një operacion i gjerë me 115 forca bashkiake, 13 efektivë policie, 11 forca të ADZM, 14 zjarrfikës, 7 vullnetarë dhe 50 efektivë të FA, të mbështetur nga dy avionë Air Tractor.
• Qafë Helmës dhe Bruç: Puna vijon në terren të vështirë; zjarri është shuar nga krahu i Bulqizës, ndërsa mbetet aktiv drejt Selishtës.
• Lufaj (Mirditë): Forcat operacionale vijojnë ndërhyrjen pas hapjes së korridoreve ndarëse, me ndihmën e një helikopteri.
• Fushë-Lajë (Pukë): Angazhohen 10 zjarrfikës, 16 forca bashkiake dhe 40 efektivë të FA.
Sipas autoriteteve, vatrat në Priskë dhe Vakumone janë vënë nën kontroll dhe po mbahen nën monitorim, ndërsa në Rrjoll situata po mbikëqyret edhe përmes dronëve. Autoritetet theksojnë se aktualisht nuk paraqitet rrezik për zonat e banuara në asnjërën nga zonat aktive.
Përditësime
Situata në Parkun Kombëtar të Lurës është përkeqësuar, me vatrat që po përhapen në tre akse: Gurë-Lurë, Fushë-Lurë dhe Borie Lurë. Autoritetet raportojnë se vatra nga fshati Lufi rrezikon të shtrihet drejt Bashkisë Mat. Për t'iu përgjigjur këtyre zhvillimeve, operacioni në terren është përforcuar me 180 forca të përgjithshme, 15 efektivë të Policisë dhe 30 të Forcave të Armatosura. Paralelisht, vatra në Qafë Helmës ka shfaqur shtrirje aktive drejt fshatit Kacni.
Deri në orën 14:00 të 17 gushtit, autoritetet raportuan gjithsej 12 vatra zjarri në shkallë vendi, nga të cilat 7 mbeten aktive dhe 3 janë nën monitorim. Operacionet për shuarjen e flakëve po përballen nga 467 forca operacionale të mbështetura nga 34 automjete zjarrfikëse. Në Drenovë të Mallakastrës, ekipet ndërhynë me sukses për neutralizimin e një vatre zjarri që u shfaq në afërsi të puseve të naftës, duke shmangur rrezikun për infrastrukturën kritike.
Autoritetet raportuan një përshkallëzim të situatës, ku numri total i vatrave të zjarrit në vend arriti në 33, nga 12 të raportuara më parë. Përballë kësaj rritjeje, shteti ka intensifikuar ndërhyrjen duke angazhuar 535 forca operacionale, një rritje nga 467 efektivë. Flota e automjeteve zjarrfikëse është zgjeruar në 51 mjete, nga 34 që ishin në përditësimin e mëparshëm. Forcat e Armatosura kanë rritur kontributin e tyre në 100 efektivë dhe 2 automjete të specializuara. Aktualisht, bilanci i zjarreve regjistron 8 vatra aktive dhe 5 vatra nën monitorim, duke shënuar një rritje nga raportimi i mëparshëm prej 7 vatrash aktive dhe 3 në monitorim.
Ministri i Mbrojtjes, Ermal Nufi, konfirmoi angazhimin e shtuar të Forcave të Armatosura në zonat e rrezikuara. Strukturat ushtarake operojnë aktualisht me 50 efektivë në Dajt, 9 në Lufaj dhe 40 në Fushë-Lajë. Ndërkohë, në vatrën e Gurë-Lurës, forcat operacionale janë përforcuar me 30 ushtarakë dhe 180 forca bashkiake. Autoritetet konfirmuan gjithashtu izolimin e vatrës në Vakumone dhe vijimin e monitorimit në Priskë.
Autoritetet raportuan deri në orën 20:00 të datës 17 gusht se numri i vatrave aktive ka zbritur në 7, ndërsa 3 vatra të tjera mbeten nën monitorim. Vatra e zjarrit në Rrjoll është shuar plotësisht. Në operacionin për shuarjen e flakëve në të gjithë vendin janë angazhuar 424 forca operacionale, mes të cilave 129 efektivë të Forcave të Armatosura dhe 3 helikopterë.
Situata e zjarreve në zonën e Pukës është përkeqësuar ndjeshëm, ku flakët në Gojan po i afrohen banesave dhe po avancojnë drejt lagjes Meshurdh. Era e fortë ka favorizuar riaktivizimin e vatrave të izoluara, duke e bërë terrenin tejet sfidues për mjetet zjarrfikëse, të cilat po përdorin rrugën e vjetër për shkak të aksesit të kufizuar. Përveç kësaj, autoritetet raportojnë vatra të reja aktive në pyjet e Tërbunit, zonën e livadheve të Hamzit dhe në drejtim të Gjegjanit, duke tejkaluar parashikimet fillestare për stabilizim të situatës.