Situata e zjarreve në territorin e Shqipërisë paraqitet në përmirësim. Sipas njoftimit të fundit të Ministrisë së Mbrojtjes dhe Agjencisë Kombëtare të Mbrojtjes Civile, autoritetet kanë izoluar ose shuar disa vatra, ndërsa operacionet vijojnë në zonat me intensitet të ulët.
Vatrat aktive dhe operacionet në terren
Aktualisht, përpjekjet e forcave operacionale janë përqendruar në katër vatra kryesore:
• Dajt (Tiranë): Punohet për izolimin e zjarrit me 50 efektivë të Forcave të Armatosura dhe një helikopter.
• Priskë: Vatra e riaktivizuar është nën monitorimin e forcave operacionale.
• Lufaj (Mirditë): Zjarri vijon me intensitet të ulët, ndërsa forcat janë pozicionuar në terren për të parandaluar përhapjen.
• Mali i Tërbunit (Pukë): Për shkak të terrenit të vështirë, operacioni përfshin 13 zjarrfikës, 8 punonjës të shërbimit pyjor, 45 forca bashkiake, 22 vullnetarë dhe 30 efektivë të FA, të mbështetur nga dy helikopterë.
Autoritetet theksojnë se në asnjërën prej këtyre zonave nuk ka rrezik për banesat apo zonat e banuara.
Zjarret e shuara dhe vatrat në monitorim
Pas ndërhyrjeve të shtuara, zjarri në Gurë-Lurë (Dibër) është shuar plotësisht, pas angazhimit të rreth 150 forcave vendore, 30 efektivëve të FA dhe dy avionëve Air Tractor. Gjithashtu, është konfirmuar shuarja e plotë e vatrës në Bruç (Mat). Ndërkohë, vatrat në Qafë Helmës, Tharri dhe Selenicë janë vënë nën kontroll dhe monitorohen nga strukturat e emergjencave civile për të shmangur çdo riaktivizim të mundshëm.
Agjencia Kombëtare e Mbrojtjes Civile mbetet në koordinim të ngushtë me prefekturat dhe bashkitë për menaxhimin e situatës, duke pasur si përparësi mbrojtjen e jetës dhe pasurisë së qytetarëve.
Përditësime
Autoritetet raportuan 25 vatra zjarri të reja në nivel kombëtar gjatë 24 orëve të fundit. Përballë kësaj situate, Ministria e Mbrojtjes përshkallëzoi operacionet me angazhimin e 350 forcave operacionale, 26 automjeteve zjarrfikëse dhe 140 efektivëve të Forcave të Armatosura. Mbështetja nga ajri u intensifikua me përdorimin e 3 helikopterëve dhe 2 avionëve Air Tractor. Ndërkohë, strukturat në terren konfirmuan shuarjen e plotë të vatrës në Tharri (Mirditë).
Autoritetet kanë lokalizuar aktualisht 4 vatra aktive në territorin e vendit, konkretisht në Dajt dhe Priskë (Tiranë), Lufaj (Mirditë) dhe Tërbun (Pukë). Operacioni më intensiv po zhvillohet në Dajt, ku 50 efektivë të Forcave të Armatosura, 15 zjarrfikës dhe 5 forca të Agjencisë së Zonave të Mbrojtura (AZM) janë angazhuar për shuarjen e flakëve. Strukturat e emergjencave civile po vijojnë ndërhyrjen në terren për të frenuar përhapjen e vatrave të mbetura.
Ministria e Mbrojtjes përditësoi të dhënat për situatën e zjarreve në orën 14:00 të datës 19 gusht 2026, duke raportuar 6 vatra zjarri në total. Prej tyre, 4 vatra mbeten aktive, ndërsa 2 të tjera janë nën monitorim të vazhdueshëm. Në terren janë angazhuar 126 forca operacionale vendore dhe 90 efektivë të Forcave të Armatosura. Situata paraqet një riaktivizim në Priskë, ndërsa vatra në Lufaj vijon me intensitet të ulët.
Situata e zjarreve është përkeqësuar deri në orën 20:00 të datës 19 gusht. Bilanci i vatrave ka shkuar në 7, nga 6 të raportuara më parë. Pesë vatra janë aktive, ndërsa 2 të tjera mbahen në monitorim. Një vatër e re është regjistruar në Shashicë (Selenicë). Pjesa e Tërbun-Gojan paraqitet më kritike, për shkak të erërave të forta që po vështirësojnë ndërhyrjen e forcave në terren.
Autoritetet raportuan 21 vatra zjarri të regjistruara gjatë 24 orëve të fundit në shkallë vendi. Sipas njoftimit më të fundit, 6 vatra mbeten aktive, ndërsa 7 të tjera janë aktualisht nën mbikëqyrje. Ekipet operacionale identifikuan vatra të reja në Shtuf (Mirditë), Shtanë-Tenë (Mirditë), Prozhem (Pukë) dhe Mali i Çikës (Palasë). Ministria e Mbrojtjes rriti ndjeshëm kapacitetet në terren, duke angazhuar 354 forca operacionale dhe 155 efektivë të Forcave të Armatosura. Operacionet mbështeten tashmë edhe nga mjete të specializuara, përfshirë ekskavatorë dhe avionë Air Tractor.