Ministria e Mbrojtjes ka bërë të ditur bilancin e situatës së zjarreve në territorin shqiptar gjatë 24 orëve të fundit, duke njoftuar se aktualisht janë 5 vatra aktive dhe 2 të tjera nën mbikëqyrje. Përballimi i këtyre zjarreve po realizohet me një kapacitet operacional që përfshin 44 automjete zjarrfikëse, mbështetjen e 105 efektivëve të Forcave të Armatosura, 3 helikopterë dhe 1 avion Air Tractor.
Vatrat aktive dhe operacionet në terren
Në qarkun e Tiranës, puna vijon për shuarjen e tri vatrave të riaktivizuara në Malin e Dajtit, ku po operojnë 25 forca të zjarrfikësve dhe të Agjencisë së Zonave të Mbrojtura, të mbështetur nga 20 efektivë të Forcave të Armatosura (FA).
Në qarkun e Dibrës, situata mbetet sfiduese në zonat e mëposhtme:
• Qafë e Helmës
• Vajkal: ku janë angazhuar 61 forca, përfshirë 30 efektivë të FA-së
• Sllatinë: ku operojnë 78 forca
• Komsi: me angazhimin e 25 efektivëve të FA-së
Autoritetet bëjnë me dije se në këto zona nuk ka rrezik për zonat e banuara. Ndërkohë, në qarkun e Elbasanit, vatrat në Malin e Dardhës dhe Malin e Qukësit janë vendosur nën mbikëqyrje dhe gjithashtu nuk paraqesin rrezik. Zjarret e raportuara më parë në Tërbaç, Vranisht (Himarë) dhe Xhyrë (Librazhd) janë deklaruar të fikura pas ndërhyrjeve me mjete tokësore dhe ajrore.
Agjencia Kombëtare e Mbrojtjes Civile (AKMC) vijon monitorimin e pandërprerë të situatës në bashkëpunim me prefekturat dhe bashkitë, duke e vendosur si prioritet mbrojtjen e jetës së qytetarëve dhe pasurisë së tyre.
Përditësime
Autoritetet raportuan një përkeqësim të situatës me 34 vatra zjarri të regjistruara në 24 orët e fundit në nivel vendi. Agjencia Kombëtare e Mbrojtjes Civile konfirmoi riaktivizimin e 3 vatrave në Malin e Dajtit, duke rritur ndjeshëm intensitetin e operacioneve. Numri i personelit të angazhuar në terren u rrit në 481 forca operacionale për t'iu përgjigjur flakëve në kohë reale.
Deri në orën 14:00, bilanci i vatrave të zjarrit në vend është stabilizuar në 12 vatra, nga të cilat 4 mbeten aktive dhe 3 nën mbikëqyrje. Autoritetet kanë angazhuar 214 forca operacionale, 6 zjarrfikëse dhe 3 helikopterë për neutralizimin e flakëve. Operacioni në zonën e Qafë-Priskës, në Dajt, po mbështetet nga dy helikopterë për shuarjen e vatrave. Ndërkohë, zjarri në Delisuf të Vlorës është shuar plotësisht, pas djegies së 2 hektarëve sipërfaqe pyjore.
Ministria e Mbrojtjes njoftoi se deri në orën 20:00 janë evidentuar gjithsej 16 vatra zjarri në vend, nga të cilat 5 janë aktive dhe 2 nën monitorim. Forcat operacionale janë shtuar në 228 persona, të mbështetur nga 10 mjete zjarrfikëse dhe 4 helikopterë. Operacioni në Komsi të Matit ka përfunduar me shuarjen e plotë të vatrës, ndërsa një vatër e re është raportuar në Kroi të Madh, Krujë.