Autoritetet e Agjencisë Kombëtare të Mbrojtjes Civile vijojnë monitorimin e situatës në të gjithë territorin, duke koordinuar ndërhyrjet me prefekturat dhe bashkitë. Prioritet mbetet mbrojtja e jetës së qytetarëve, banesave dhe pasurisë.
Vatrat aktive dhe operacionet në terren
Aktualisht, përpjekjet e forcave të rendit dhe të ushtrisë janë fokusuar në disa zona kryesore:
• Mali i Dajtit: Vijon operacioni intensiv me mbështetjen e efektivëve të ushtrisë, shërbimit pyjor dhe kapaciteteve ajrore.
• Qafë e Helmes, Bulqizë: Zjarri është riaktivizuar në dy vatra brenda një pylli me pisha të dendura.
• Mali i Çikës, mbi Palasë: Për shkak të terrenit të thepisur dhe të paaksesueshëm nga toka, operacioni mbështetet nga dy avionë “Air Tractor”.
• Prozhem, Pukë: Një vatër vijon të jetë aktive në sipërfaqe pyjore, ku po ndërhyhet nga toka me mbështetjen e 30 trupave ushtarake.
• Shtuf, Mirditë: Vatra mbetet aktive, por me intensitet të ulët dhe po monitorohet nga strukturat vendore.
• Shtanë–Tenë, Mirditë: Situata paraqitet e stabilizuar, ndërsa vijon puna për monitorim.
Ndërkohë, në zonat e Gjegjanit, Gojanit të Vogël dhe Gojanit të Madh, vatrat raportohen si të izoluara ose të shuara plotësisht, por mbahen nën monitorim të rreptë për të shmangur çdo riaktivizim të mundshëm nga era.
Përditësime
Autoritetet regjistruan 21 vatra zjarri gjatë 24 orëve të fundit në shkallë vendi. Operacionet e shuarjes intensifikuan reagimin me angazhimin e 354 forcave operacionale, 24 automjeteve zjarrfikëse, 155 efektivëve të Forcave të Armatosura, 3 helikopterëve dhe 1 ekskavatori të rëndë. Në zonën e Qafës së Helmës, ekipet e shpëtimit shtuan ndërhyrjen me 11 zjarrfikës të angazhuar në terren.
Autoritetet raportojnë reduktimin e numrit të vatrave të zjarrit në 15 në shkallë vendi, nga 21 të identifikuara më parë. Aktualisht, 7 vatra mbeten aktive, ndërsa 8 të tjera mbahen nën monitorim. Krastë e Krujës është identifikuar si zona më kritike për shkak të rrezikut të drejtpërdrejtë për zonat e banuara. Operacionet në terren mbështeten nga 213 forca operacionale, të cilave u shtohen 2 avionë Air Tractor dhe 2 helikopterë në ndërhyrjet nga ajri.
Ministri i Mbrojtjes, Ermal Nufi, konfirmoi zyrtarisht angazhimin e Forcave të Armatosura në operacionet e shuarjes së vatrave të zjarrit. Në vatrën kritike të Krastës në Krujë po operojnë forcat zjarrfikëse nga Kruja, Kamza dhe Vora. Në total, operacionet po mbështeten nga 153 forca operacionale dhe 60 efektivë të Forcave të Armatosura. Strukturat në terren po përdorin 10 mjete zjarrfikëse dhe 1 ekskavator të rëndë për të frenuar përhapjen e flakëve.
Autoritetet raportojnë reduktimin e vatrave aktive të zjarrit në 4 në shkallë vendi. Në Malin e Dajtit, operacioni po mbështetet nga 30 efektivë të Forcave të Armatosura dhe një helikopter, ndërsa në Krastë të Krujës forcat po operojnë me mbështetje ajrore nga një helikopter shtesë.
Ministria e Mbrojtjes rriti angazhimin në Pukë me 40 efektivë të Forcave të Armatosura për neutralizimin e vatrave të zjarrit. Autoritetet konfirmuan shuarjen e plotë të vatrave në Gjegjan, Gojan i Vogël dhe Gojan i Madh. Ndërkohë, vatra në Prozhëm mbetet nën kontroll, duke shënuar intensitet shumë të ulët drejt shuarjes totale.
Forcat operacionale rritën angazhimin në 311 efektivë dhe 16 mjete zjarrfikëse për të përballuar shtimin e vatrave të zjarrit. Forcat e Armatosura përforcuan operacionet me 70 efektivë dhe 3 helikopterë. Autoritetet raportuan 3 vatra të reja në Ballenjë, Qafë e Helmës në Dibër dhe malin e Luzatit në Tepelenë. Bilanci ditor konfirmon 26 vatra të raportuara, nga të cilat 14 janë shuar, 6 mbeten aktive dhe 6 janë nën monitorim të vazhdueshëm.