Ministria e Mbrojtjes raportoi se gjatë 24 orëve të fundit janë shuar pjesa më e madhe e vatrave të zjarrit në vend. Aktualisht vijojnë të jenë aktive 5 vatra, ndërsa një zonë është nën monitorim të vazhdueshëm. Në operacionet në terren janë përfshirë strukturat e Agjencisë Kombëtare të Mbrojtjes Civile dhe sistemi i mbrojtjes civile.
Zonat e prekura dhe ndërhyrjet
Në qarkun e Krujës, forcat operacionale janë angazhuar në lagjen Abaze dhe në zonën Krastë–Halil. Autoritetet bëjnë me dije se nuk ka rrezik për zonat e banuara, ndërsa 4 helikopterë të Forcës Ajrore janë përdorur për frenimin e flakëve në këto zona. Në bashkinë Tiranë, operacionet vijojnë në Priskë të Madhe, ndërsa zona e Dajtit mbahet nën vëzhgim. Në bashkinë Patos, në Drenie, është evidentuar një riaktivizim i flakëve në thellësi të pyllit, ku forcat po vijojnë ndërhyrjen. Në Përmet, vijon puna për shuarjen e vatrës në malin e Nemërçkës, pranë kufirit me Greqinë, e cila nuk paraqet rrezik për banesat.
Vatrat e shuarura
Autoritetet konfirmuan se zjarret në disa zona të tjera janë shuar plotësisht, konkretisht:
• Mallakastër: Riban, Ngraçan, Panahor dhe Çyçen
• Kavajë: Cikallesh
• Kurbin: Vilëz
• Lezhë: Kallmet të Vogël
• Malësi e Madhe: Goraj–Budishë
Përditësime
Agjencia Kombëtare e Mbrojtjes Civile raportoi se gjatë 24 orëve të fundit janë menaxhuar 25 vatra zjarri në të gjithë vendin. Operacionet në terren janë intensifikuar me angazhimin e 37 automjeteve zjarrfikëse dhe 365 forcave operacionale. Forcat e Armatosura kanë dislokuar 158 efektivë dhe 10 mjete logjistike për mbështetjen e strukturave vendore në zonat më problematike.
Autoritetet vunë nën kontroll vatrën e zjarrit në Kurorën e gjelbër të qytetit të Pukës, ndërsa Policia po heton dyshimet për zjarrvënie të qëllimshme. Në operacionin për shuarjen e flakëve në Krastë–Halil janë angazhuar 2 helikopterë që prej orëve të para të mëngjesit.
Deri në orën 16:00, bilanci i vatrave aktive është rritur në 8, nga 5 të raportuara më parë. Autoritetet raportuan vatra të reja në malin Dhëmbel, mbi fshatin Badilonjë, dhe në Gurë-Lurë, bashkia Dibër, ndërsa flakët janë riaktivizuar në pyllin me pisha mbi tunelet e Qafë Mollës në Dajt. Për shuarjen e zjarreve janë angazhuar avionët Air Tractor në 2 misione. Aktualisht, në terren operojnë 165 forca operacionale dhe 85 efektivë të Forcave të Armatosura.
Autoritetet kanë intensifikuar ndërhyrjen nga ajri me 7 misione helikopterësh për shuarjen e vatrave të zjarrit. Në zonën e Krastë–Halilit, ndërhyrja ajrore ka normalizuar situatën duke eliminuar rrezikun për banesat përreth. Njëkohësisht, një grup prej 22 efektivësh nga MZSH dhe ADZM po operojnë në terren për të monitoruar dhe neutralizuar flakët në masivin pyjor të Dajtit.
Autoritetet raportuan 23 vatra zjarri të reja gjatë 12 orëve të fundit, nga të cilat 8 vatra mbeten aktive në terren. Për menaxhimin e situatës, forcat operacionale janë rritur në 310 efektivë, të mbështetur nga 103 pjesëtarë të Forcave të Armatosura. Operacioni në Gurë-Lurë, Dibër, po kryhet nga një grup prej 80 personash, përfshirë 25 zjarrfikës, 20 forca të ADZM dhe 35 vullnetarë, të asistuar nga 2 helikopterë. Ndërkohë, ekipet e shpëtimit konfirmuan shuarjen e plotë të vatrës në Vilëz, Kurbin.
Operacioni i shuarjes së zjarreve është intensifikuar me angazhimin e 26 automjeteve zjarrfikëse dhe mjeteve ajrore, duke përfshirë 3 helikopterë dhe 2 avionë Air Tractor. Autoritetet konfirmuan shtimin e vatrës në malin e Dhëmbelit në listën e zonave ku po ndërhyhet. Ndërhyrjet ajrore janë ndërprerë gjatë natës për shkak të sigurisë, ndërsa forcat operacionale vazhdojnë monitorimin nga toka.
Autoritetet raportuan një përmirësim të ndjeshëm të situatës, me numrin e vatrave aktive që ka rënë në 3, përkatësisht në Bogë, Rehovë dhe Goranxi. Gjatë 24 orëve të fundit, forcat operacionale shuan 8 vatra zjarri në bashkitë Skrapar, Elbasan, Maliq, Krujë, Lushnje, Sarandë, Selenicë dhe Mirditë. Për vatrën në Goranxi, qeveria aktivizoi Mekanizmin e Mbrojtjes Civile të Bashkimit Evropian për të siguruar mbështetje shtesë. Aktualisht, 255 forca operacionale janë të angazhuara në terren për të mbajtur situatën nën kontroll.