Këshilltari për Sigurinë në Partinë Demokratike, Xhemal Gjunkshi, ka ngritur alarmin për situatën e zjarreve në Lurë, duke kërkuar angazhim të menjëhershëm dhe mbështetje shtesë nga ajri. Sipas tij, pas më shumë se 8 orësh aktivitet, flakët kanë dalë jashtë kontrollit, duke shkaktuar dëme të mëdha në qindra hektarë pyje e kullota dhe duke rrezikuar drejtpërdrejt banorët, banesat dhe bagëtinë në zonën e Borje-Lurës dhe Fushë-Lurës.
Në reagimin e tij, Gjunkshi kërkoi një vlerësim profesional të situatës, shtimin e forcave në terren, përdorimin e mjeteve të rënda dhe hartimin e një plani për mbrojtjen apo evakuimin e popullatës. Ai kritikoi autoritetet për mungesë të kapaciteteve të specializuara, duke theksuar nevojën për praninë e shtetit pranë qytetarëve.
Nga ana tjetër, Ministria e Mbrojtjes njoftoi se në shkallë kombëtare janë evidentuar 23 vatra zjarri gjatë 12 orëve të fundit, nga të cilat 8 vazhdojnë të jenë aktive. Për rastin konkret në Gurë-Lurë, ministria raportoi se operacioni po zhvillohet nga forcat zjarrfikëse dhe vullnetarë, ndërsa për mbrojtjen e banesave janë angazhuar 2 helikopterë të Forcave të Armatosura. Sipas autoriteteve, ndërhyrja nga ajri është ndërprerë gjatë orëve të mbrëmjes për arsye sigurie, ndërsa operacioni për neutralizimin e plotë të vatrave vijon nga toka përmes strukturave të mbrojtjes civile, të cilat do të qëndrojnë në vendngjarje deri në shuarjen e plotë të tyre.