Situata në malin e Tërbunit në Pukë paraqitet jashtë kontrollit për shkak të një zjarri që po përhapet me shpejtësi në masivin pyjor. Flakët, të favorizuara nga era dhe konfiguracioni i terrenit, kanë përfshirë sipërfaqe të konsiderueshme të mbjella me pishë të zezë.
Zjarri ka prekur edhe një banesë të braktisur që ndodhet në lagjen Pezhve, e cila është në pronësi të Ali Bajramit. Terreni i thepisur dhe i thyer malor e ka bërë të pamundur përdorimin e mjeteve zjarrfikëse deri në zonën e prekur. Si pasojë, forcat zjarrfikëse të angazhuara në terren po ndërhyjnë duke përdorur mjete rrethanore, në përpjekje për të krijuar një perimetër sigurie dhe për të frenuar përparimin e flakëve drejt pjesëve të tjera të pyllit.
Autoritetet përkatëse vijojnë monitorimin e situatës dhe vlerësimin e mundësive për ndërhyrje më efikase në zonat më të prekura. Përpjekjet për izolimin e vatrave vijojnë, ndërsa kushtet atmosferike mbeten një faktor sfidues për ekipet në terren.
Përditësime
Situata në malin e Tërbunit është përkeqësuar, me flakët që janë shtrirë në një vijë prej 12 kilometrash. Zjarri po i afrohet zonave të banuara në lagjen Pezhvë, duke detyruar autoritetet lokale të kërkojnë zyrtarisht ndërhyrje nga ajri me helikopterë. Në terren janë angazhuar efektivë të ushtrisë përkrah zjarrfikësve për të frenuar përhapjen. Ndërkohë, hetimet paraprake nga autoritetet kompetente dyshojnë se zjarri është vënë me dashje.
Policia e Shtetit konfirmoi se deri më tani nuk ka asnjë person të ndaluar apo të identifikuar si autor i zjarrvënies në malin e Tërbunit. Hetimet për identifikimin e përgjegjësve për zjarrin e qëllimshëm vijojnë intensivisht nga grupi hetimor në terren.