Dogana e Kosovës ka zbuluar rreth një milion euro të padeklaruara në pikëkalimin kufitar Merdar, falë skanerit mobil Rapiscan të dhuruar nga Shtetet e Bashkuara të Amerikës një muaj më parë. Ngjarja ndodhi dje gjatë një kontrolli në hyrje të territorit të Kosovës.
Automjeti u selektua bazuar në analizën e riskut dhe procedurat standarde. Fillimisht u skanua me rreze X-Ray, ku u identifikua një hapësirë e dyshimtë e modifikuar në dyshemenë. Pas kësaj, zyrtarët e Doganës kërkuan asistencë nga Policia Kufitare, e cila përdori pajisjen fibroskopike për verifikim të mëtejshëm.
Si rezultat, u ndaluan tre persona, ndërsa automjeti hynte nga Serbia. Pajisja, në vlerë 3 milionë dollarësh, u inaugurua në Merdar me praninë e ngarkuatares me punë të Ambasadës Amerikane, Anu Prattipati, ministrit të Punëve të Brendshme, Xhelal Sveçla, ministrit të Financave, Hekuran Murati, dhe drejtorit të përgjithshëm të Doganës, Agron Llugaliu.
Ambasada Amerikane njoftoi se "kjo teknologji rrit kapacitetet e zbulimit, mbështet tregtinë e ligjshme dhe avancon interesat e përbashkëta të sigurisë dhe zhvillimit ekonomik", duke luftuar trafikimin e paligjshëm dhe mallrat e falsifikuara.
Përditësime
Drejtori i Doganës, Agron Llugaliu, konfirmoi në LinkedIn identitetet e tre të arrestuarve dhe e cilësoi operacionin si goditje të rëndësishme ndaj financave të paligjshme, me urdhër të Prokurorisë Speciale.
Të arrestuarit janë:
- Aurel Kaziu, 28-vjeçar, efektiv policie në Komisariatin nr. 5 Tiranë (pezulluar dhe nën hetim);
- Ardit Laska;
- Etnik Ahmaxhokaj.
Aurel Kaziu dyshohet për përdorim të statusit policor. Ai drejtoi furgonin pas turnit të natës pa njoftuar eprorët dhe ka histori të mëparshme me transportin e mallrave. Furgoni lidhet me Shqipërinë.