Drejtori i Përgjithshëm i Policisë së Shtetit, Skënder Hita, ka vendosur përjashtimin nga radhët e policisë të efektivit Ulian Shpataraku. Vendimi është marrë me motivacionin e mosparaqitjes së rregullt në detyrë.
Shpataraku mbante funksionin e asistentit në Departamentin për Teknologjinë e Informacionit. Në muajin mars ai ishte pezulluar nga detyra nga drejtori i përkohshëm Sokol Bizhga për të njëjtin shkak.
Burimet bëjnë të ditur se Ulian Shpataraku ndiqte studimet master në Akademinë e Sigurisë dhe dyshohet se përdorte vijimin e studimeve si argument për të mos u paraqitur rregullisht në punë. Ai cilësohet si një nga njerëzit më të besuar të ish-drejtorit të Policisë së Shtetit, Ilir Proda.
Si çdo efektiv i përjashtuar, Shpataraku ka të drejtën e ankimit. Komisioni përkatës pritet të konfirmojë ose të anulojë vendimin brenda një muaji.
Përditësime
Skënder Hita firmosi sot përjashtimin e Ulian Shpatarakut nga policia për mosparaqitje në punë. Pezullimi u vendos më 4 mars nga Sokol Bizhga për moszbatim të dispozitave ligjore, me urdhër që studimet master të ndiqeshin jashtë orarit zyrtar të punës.