Pas një periudhe 9-mujore larg shërbimit, oficeri Ritvan Pali është rikthyer në strukturat e Policisë së Shtetit. Emërimi i tij në postin e rëndësishëm të shefit të Operacionales në Policinë e Lezhës u bë nga drejtori i Përgjithshëm, Skënder Hita, në kuadër të ndryshimeve në kupolën drejtuese të institucionit.
Karriera e Ritvan Palit mori një kthesë në prill të vitit 2025, kur në cilësinë e shefit të Komisariatit nr. 2 në Tiranë, ai udhëhoqi operacionin për arrestimin e Altin Morinës. Ky i fundit, ish-efektiv i RENEA-s, ishte person i shpallur në kërkim nga SPAK për vepra penale në fushën e trafikut të lëndëve narkotike dhe pjesëmarrjes në grup të strukturuar kriminal.
Pas këtij operacioni, Pali u përball me një sërë masash administrative gjatë drejtimit të Ilir Prodës, të cilat përfshinin transferime të shpeshta dhe ulje të gradës. Ndër të tjera, A2 News raporton se oficeri u transferua në Komisariatin e Leskovikut, një pozicion i konsideruar si ndëshkues. Në lidhje me këto vendime, Pali iu drejtua Gjykatës Administrative, e cila vendosi në favor të tij, duke shfuqizuar masat disiplinore dhe duke i rikthyer gradën. Pas këtyre zhvillimeve, oficeri, i cili mban edhe një diplomë në fushën e juridikut, vendosi të largohej nga policia, për t'u rikthyer tashmë pas ardhjes së Skënder Hitës në krye të institucionit.