Një ngjarje e rëndë është regjistruar në ambientet e Policisë Bashkiake në Tiranë, ku një punonjës është arrestuar pas një konflikti fizik me eprorin e tij. I arrestuari është shtetasi Adi Hazizi, 31 vjeç, i cili dyshohet se ka goditur me grusht shefin e Sektorit të Mbikëqyrjes së Territorit, Skënder Delija.
Sipas informacioneve paraprake, konflikti ka nisur si pasojë e një vendimi administrativ për transferimin e Adi Hazizit nga sektori ku shërbente në një tjetër. Pas komunikimit të këtij vendimi nga ana e Skënder Delijës, punonjësi është drejtuar për në zyrën e eprorit të tij. Fillimisht, mes palëve ka pasur një përplasje verbale, e cila më pas është përshkallëzuar në goditje fizike.
Burimet bëjnë me dije se i dëmtuari ka pretenduar që dhuna ndaj tij ka ndodhur për shkak të detyrës, pasi ishte ai që kishte njoftuar vartësin për vendimin e marrë nga drejtuesit e institucionit për lëvizjen e tij. Pas denoncimit, shërbimet e Policisë kanë ndërhyrë duke vënë në pranga 31-vjeçarin. Ndaj tij rëndon akuza për goditje për shkak të detyrës.
Aktualisht, organet kompetente po kryejnë veprimet e nevojshme procedurale për zbardhjen e plotë të rrethanave të ngjarjes. Duhet theksuar se çdo person prezumohet i pafajshëm deri sa fajësia e tij të vërtetohet me një vendim gjyqësor të formës së prerë.
Përditësime
Gazetari Besar Bajraktaraj raporton se incidenti ndodhi më 29 korrik. Sipas burimeve, konflikti fizik ndodhi brenda ambienteve të institucionit, menjëherë pas komunikimit të urdhrit të transferimit për punonjësin e Policisë Bashkiake.