Skënder Hita, drejtori i ri i Përgjithshëm i Policisë së Shtetit, zhvilloi në Tiranë më 8 prill 2026 takimin e parë me një delegacion nga Qendra për Krimin e Organizuar dhe Krimet e Rënda në Europol (ESOCC).
Delegacioni kryesohej nga Andy Kraag, drejtues i kësaj qendre, i shoqëruar nga shefi i Njësisë në Projektin Analitik HROCG – Grupet Kriminale me Rrezikshmëri të Lartë, si dhe nga zëvendësdrejtuesi i njësisë.
Gjatë takimit, Hita dhe Kraag vlerësuan marrëdhëniet e mira mes Policisë së Shtetit dhe Europol-it, duke theksuar rëndësinë e forcimit të mëtejshëm të bashkëpunimit. Hita siguroi përfaqësuesit për angazhimin dhe vendosmërinë e tij dhe të institucionit për thellimin e këtij bashkëpunimit. Ai nënvizoi se vetëm me bashkëveprim të ngushtë dhe pa barriera mund të arrihen rezultate konkrete në luftën kundër krimit të organizuar.
Kraag uroi Hitën për detyrën e re dhe garantoi mbështetje të pakushtëzuar nga Europol për Policinë e Shtetit. Kjo mbështetje përfshin shkëmbimin e informacionit për goditjen e krimit të organizuar, krimeve në fushën e narkotikëve, kontrabandimit të emigrantëve dhe krimeve kibernetike, si dhe zhvillimin e hetimeve proaktive dhe operacioneve të përbashkëta me Europol-in dhe vendet anëtare.
Në fokus ishte zbatimi i strategjisë së re të Policisë së Shtetit kundër krimit të organizuar 2026-2028, si dhe Projekti HROCG. Ky projekt përfshin identifikimin, profilizimin dhe ndjekjen e grupeve kriminale më të rrezikshme në nivel ndërkombëtar, analizën e rrjeteve kriminale, shkëmbimin e inteligjencës dhe koordinimin e operacioneve të përbashkëta për goditjen e tyre. Ai synon rritjen e kapaciteteve hetimore dhe operacionale, si dhe ndërhyrjen e sinkronizuar ndaj aktiviteteve kriminale ndërkufitare.