Klubi i futbollit Skënderbeu ka reaguar pas ngjarjes së rëndë të ndodhur në qytetin e Korçës, ku 20-vjeçari Joan Zyko humbi jetën pasi u qëllua për vdekje me armë zjarri. Nëpërmjet një njoftimi zyrtar, klubi ka përkujtuar lidhjen e të riut me ngjyrat bardhekuqe, duke theksuar se ai ka qenë pjesë e akademisë deri në vitin 2017, ku luante si portier me ekipet e moshave U-15. Përveç karrierës si lojtar, Zyko njihej edhe si një tifoz i zjarrtë i skuadrës.
Ngjarja tragjike ka tronditur opinionin publik, ndërsa autoritetet policore kanë vënë në pranga autorin e dyshuar, Kristjan Sterjo. Sipas informacioneve të bëra të ditura, autori dhe viktima kanë qenë shokë fëmijërie. Hetimet paraprake tregojnë se konflikti ka ndodhur për shkak të përplasjeve për dominancë mes të rinjve, ndërsa autori dyshohet se ka përdorur një armë zjarri tip kallashnikov për të kryer krimin në ambientet e një pallati. Policia po vijon verifikimet për të zbardhur rrethanat e plota dhe motivet e kësaj ngjarjeje, përfshirë pretendimet e të dyshuarit për konflikte të mëparshme verbale dhe ngacmime të pretenduara.
Sipas raportimeve, autori i dyshuar është arrestuar nga policia në afërsi të banesës së tij pas kërkimeve të intensifikuara.