Në National Mall të Uashingtonit u shfaq të martën një skulpturë artistike e lyer me ngjyrë ari dhe e lartë rreth 3.6 metra. Ajo paraqet Donald Trump qëndron pas Jeffrey Epstein-it me krahët e shtrirë drejt Monumentit të Uashingtonit, mbi një kopje të hundës së anijes, duke rikrijuar skenën e famshme nga filmi Titanic. Vepra titullohet “King of the World” dhe i atribuohet kolektivit anonim The Secret Handshake.
Ky grup ka realizuar edhe instalacionin “Jeffrey Epstein Walk of Shame” në Farragut Square, pranë Shtëpisë së Bardhë, me yje që lidhen me figura të njohura nga dosja Epstein.
Në bazën e skulpturës ndodhet një pllakë me këtë përshkrim: "Historia tragjike e dashurisë mes Jack dhe Rose u ndërtua mbi udhëtime luksoze, festa të zhurmshme dhe skica sekrete nudo. Ky monument nderon lidhjen mes Donald Trump dhe Jeffrey Epstein, një miqësi e ndërtuar mbi udhëtime luksoze, festa të zhurmshme dhe skica sekrete nudo."
Instalacioni shoqërohet me dhjetë pankarta të mëdha me fotografi të Trump-it dhe Epstein-it, sloganin “Make America Safe Again” dhe një logo të ndryshuar të Ministrisë së Drejtësisë së SHBA-së. Artistët thonë se frymëzimi vjen nga postimet e Trump-it në rrjetet sociale, ku ai e quan veten mbret.
Këto vepra synojnë të mbajnë në vëmendje publike dosjen Epstein, ku emri i Trump-it përmendet mijëra herë.