Shtetet e Bashkuara të Amerikës kanë ekstraduar drejt Shqipërisë Sokol Hoxhën, pas një hetimi disavjeçar që zbuloi përdorimin e identiteteve të rreme për t'iu shmangur drejtësisë për gati tri dekada. Hoxha u arrestua në muajin maj në shtetin e Ohio-s, pas një operacioni të koordinuar ndërkombëtar të koduar “Globi”.
Sipas njoftimit zyrtar të Ambasadës së Shteteve të Bashkuara në Tiranë, i dënuari kishte arritur të siguronte status ligjor në një vend evropian dhe më pas qëndrim të përhershëm në SHBA nën emrin e rremë Hysen Gashi. Identifikimi i tij u bë i mundur falë punës së Njësisë së Hetimeve Penale Ndërkombëtare (DSS) pranë Ambasadës së SHBA në Tiranë, në bashkëpunim me Shërbimin e Marshallëve të SHBA-së, ICE, Departamentin e Drejtësisë, INTERPOL-in dhe Policinë e Shtetit Shqiptar.
Sokol Hoxha rezulton i dënuar nga autoritetet shqiptare me 25 vite burg për vrasjen e dy vëllezërve, Ilirjan dhe Hektor Banaj, në Patos, ngjarje e ndodhur në vitin 1997. Po ashtu, në vitin 2010, Gjykata e Brukselit e ka dënuar atë me burgim të përjetshëm për vrasjen e një shtetaseje shqiptare në Belgjikë.
Në reagimin e saj, Ambasada Amerikane theksoi se ky rast shërben si kujtesë se Shtetet e Bashkuara nuk do të shërbejnë si strehë e sigurt për individët që keqpërdorin sistemin e imigracionit për t'iu shmangur përgjegjësisë për krime të rënda të kryera jashtë vendit. Pas mbërritjes në Shqipëri, Hoxha i është dorëzuar autoriteteve për t’iu nënshtruar procedurave ligjore të mëtejshme.