Policia e Shtetit ka njoftuar arrestimin e shtetasit shqiptar Sokol Hoxha, 51 vjeç, lindur në Fier, në shtetin e Ohajos në Shtetet e Bashkuara të Amerikës. Arrestimi u krye në kuadër të operacionit të koduar Globi pas një bashkëpunimi të gjerë ndërkombëtar.
I arrestuari ishte në kërkim që prej vitit 1997. Në vitin 2000 Gjykata e Fierit e dënoi atë me 25 vjet burgim për vrasjen e dy vëllezërve, shtetasve H. B. dhe I. B., të kryer në bashkëpunim më 30 mars 1997 në Patos të Fierit. Në vitin 2010 Gjykata e Brukselit e dënoi me burgim të përjetshëm për vrasjen e një shtetaseje shqiptare më 29 gusht 1997 në Bruksel, të cilën ai e kishte shfrytëzuar më parë për prostitucion.
Operacioni u finalizua me pjesëmarrjen e Shërbimit të Sigurisë Diplomatike të Ambasadës Amerikane në Tiranë, Departamentit të Policisë Kriminale, Drejtorisë së Interpolit në Policinë e Shtetit dhe zyrave të Interpolit në Uashington, Mançester e Bruksel, si dhe Marshallëve Amerikanë dhe agjencive të tjera ligjzbatuese të SHBA-së.
Autoritetet shqiptare po punojnë me autoritetet amerikane për ekstradimin e të arrestuarit në Shqipëri, ku ai do të përballet me drejtësinë për ekzekutimin e vendimit penal.
Përditësime
Hetuesit identifikuan bashkëpunëtorin e Sokol Hoxhës si D.S., i cili përdori një armë zjarri pavarësisht motiveve të dobëta për vrasjen.
Viktimat e vrasjeve në Patos u identifikuan si vëllezërit Banaj (H.B. dhe I.B.). Autoritetet belge konfirmuan se Brunilda Hoxha ishte viktima, me të cilën Sokol Hoxha kishte sajuar një martesë false. Ai u arratis në Britaninë e Madhe me dokumente të falsifikuara kosovare, duke përfituar nga lufta e Kosovës.