Përfaqësuesi i Bashkimit Evropian për dialogun, Peter Sorensen, ka zhvilluar një takim zyrtar me ministrin e Jashtëm të Serbisë, Marko Gjuriq, për të diskutuar mbi ecurinë e procesit të normalizimit të marrëdhënieve mes Kosovës dhe Serbisë.
Në një njoftim të publikuar pas takimit, Sorensen bëri të ditur se thelbi i bisedimeve ishte rëndësia e angazhimit të vazhdueshëm në dialogun e ndërmjetësuar nga BE-ja. Ai kërkoi zbatimin e plotë të të gjitha marrëveshjeve të dakorduara më parë, me theks të veçantë te Marrëveshja e Ohrit e vitit 2023. Krahas kësaj, palët diskutuan edhe për avancimin e normalizimit ekonomik, i cili synon të sjellë ndikime pozitive në jetën e përditshme të qytetarëve.
Marrëveshja e Ohrit, e njohur si rruga drejt normalizimit, mbetet një pikë kyçe e obligimeve ndërkombëtare. Dialogu i nivelit të lartë ndërmjet Kosovës dhe Serbisë nuk ka shënuar takime të drejtpërdrejta të këtij niveli që nga viti 2023, ndërsa çështje si ajo e personave të zhdukur dhe mekanizmat e vetëmenaxhimit vazhdojnë të mbeten pjesë e sfidave në agjendën e diskutimeve.