Sot, më 7 maj, përfundon afati që partitë politike të regjistruara në Republikën e Kosovës ta njoftojnë Komisionin Qendror të Zgjedhjeve (KQZ) lidhur me pjesëmarrjen ose mospjesëmarrjen në zgjedhjet e parakohshme parlamentare, si dhe për deklarimin e koalicioneve parazgjedhore.
Zëdhënësi i KQZ-së, Valmir Elezi, bëri të ditur se kjo periudhë ka nisur më 1 maj dhe mbyllet sot. Deri në mërkurë në orën 12:00, KQZ kishte pranuar njoftimin për pjesëmarrje nga 18 parti politike, mospjesëmarrjen nga 4 parti të tjera dhe formimin e një koalicioni të përbërë nga 2 parti.
Koalicioni i vetëm i deklaruar deri tani është ai parazgjedhor i formuar nga dy parti boshnjake: Demokratska Stranka Boshnjaka dhe Demokratska Stranka Vatan, të cilat e kanë regjistruar koalicionin me emrin "Koalicija VAKAT".
Sipas KQZ-së, këto obligime vlejnë vetëm për 53 partitë politike të regjistruara në Republikën e Kosovës. Njoftimi i pjesëmarrjes ose mospjesëmarrjes dhe formimi i koalicioneve është proces i veçantë nga aplikimi për certifikim i subjektve të reja politike dhe dorëzimi i listave të kandidatëve për deputetë.
Afati për aplikim për certifikim të subjektve të reja politike, përfshirë koalicionet, nismat qytetare dhe kandidatët e pavarur, ka filluar më 2 maj dhe përfundon më 10 maj.