Në zgjedhjet e parakohshme parlamentare të 7 qershorit në Kosovë, nesër, më 10 maj në orën 24:00, përfundon afati për subjektet e reja politike për të aplikuar për certifikim të pjesëmarrjes.
Deri më 7 maj, 22 parti politike dhe 3 koalicione kanë njoftuar pjesëmarrjen. Subjektet e reja, si koalicionet, nismat qytetare dhe kandidatët e pavarur, duhet të dorëzojnë online në KQZ, në Zyrën për Regjistrim, Certifikim dhe Kontrollin Financiar, aplikimin për certifikim. Partitë politike konsiderohen të certifikuara automatikisht sipas Ligjit për Zgjedhjet e Përgjithshme.
Zëdhënësi i KQZ-së, Valmir Elezi, sqaroi se ky proces zbatohet vetëm për subjektet e reja politike. "Deri më 10 maj, subjektet e reja politike (koalicionet, nismat qytetare dhe kandidatët e pavarur) duhet të dorëzojnë online në KQZ, respektivisht në Zyrën për Regjistrim, Certifikim dhe Kontrollin Financiar, aplikimin për certifikim për pjesëmarrje në zgjedhjet e parakohshme për Kuvendin e Kosovës", tha ai.
Dy ditë më pas, më 12 maj, përmbyllët afati 11-ditor për të gjitha subjektet politike për të dorëzuar online listën me emrat e kandidatëve për deputetë. Procedura kryhet përmes platformës elektronike, si në zgjedhjet e fundit të 28 dhjetorit të vitit të kaluar.