Komisioni Qendror i Zgjedhjeve ka njoftuar se pas përmbylljes së procesit të certifikimit janë publikuar listat e kandidatëve për deputetë të certifikuar. Këto lista përfshijnë kandidatët që do të marrin pjesë në zgjedhjet e parakohshme për Kuvendin e Kosovës më 7 qershor 2026.
Në mbledhjen e mbajtur më 16 maj, KQZ certifikoi gjithsej 902 kandidatë nga 21 subjekte politike. Kandidatët e certifikuar përfaqësojnë 17 parti politike, 3 koalicione dhe 1 kandidat të pavarur. Nga ky numër, 593 janë burra dhe 309 janë gra.
KQZ ka bërë me dije se listat mund të përmbajnë lëshime teknike të cilat do të plotësohen. Në rast se ndonjë kandidat ose subjekt politik vëren ndonjë gabim, mund të kërkojë përmirësimin përmes përfaqësuesit të autorizuar në adresën elektronike zyra.kqz@kqz-ks.org.