KQZ: Kandidatët për deputetë do t’i nënshtrohen verifikimit institucional

Partitë politike duhet të dorëzojnë të martën listat e kandidatëve për deputetë në Komisionin Qendror të Zgjedhjeve (KQZ) për zgjedhjet parlamentare të 7 qershorit për Kuvendin e Kosovës. Afati për 27 subjektet politike mbyllet në mesnatë të së martës, pas një periudhe 11-ditore dorëzimi online.

KQZ ka paralajmëruar se të gjithë kandidatët do t’i nënshtrohen procesit të verifikimit institucional për të kontrolluar përmbushjen e kritereve ligjore, sipas nenit 30 të Ligjit për Zgjedhjet e Përgjithshme. Komisioni do t’u dërgojë institucioneve relevante kërkesat për verifikim bashkë me listat e kandidatëve.

Zëdhënësi i KQZ-së, Valmir Elezi, deklaroi: «Në kuadër të përmbushjes së obligimeve ligjore që kanë të bëjnë me përshtatshmërinë/aftësinë e kandidatëve për certifikim, Komisioni Qendror i Zgjedhjeve do t’u dërgojë institucioneve relevante kërkesat për verifikim, së bashku me listën e kandidatëve që synojnë të certifikohen për pjesëmarrje në zgjedhje, me qëllim të vlerësimit nëse ata janë në përputhje me nenin 30 të Ligjit për Zgjedhjet e Përgjithshme. Kjo është një praktikë e ndjekur nga KQZ edhe në proceset e kaluara zgjedhore».

Kriteret kryesore të nenit 30

Neni 30 përcakton pengesa për certifikimin e kandidatëve, si:

• funksionarë me status të veçantë sipas ligjit për zyrtarët publikë;
• anëtarë të shërbimit të jashtëm dhe përfaqësues diplomatikë;
• kryesues ose anëtarë të KQZ-së dhe komisioneve komunale;
• zyrtarë të PZAP-it;
• persona me vendim gjyqësor për heqje të të drejtës së kandidimit;
• të dënuar në tre vjetët e fundit me burgim efektiv prej një ose më shumë vitesh;
• ata që nuk kanë paguar gjoba të vendosura nga PZAP ose KQZ.

Ky proces është hap kryesor para certifikimit të subjekteve politike dhe kandidatëve.