Leuni Kastrati, 28-vjeçar nga fshati Turjakë i Malishevës në Kosovë, humbi jetën në një aksident rrugor në Slloveni para dy ditësh. Lamtumira e fundit i jepet sot në ora 14:00, në varrezat e fshatit Turjakë – Lagjja e Madhe.
Aksidenti ndodhi në autostradën A1, mes Lubjanës dhe Mariborit, pranë qytetit Slovenska Bistrica në verilindje të Sllovenisë. Rreth orës 08:00 të mëngjesit, autocistera me karburant, e drejtuar nga Kastrati drejt Mariborit, humbi kontrollin, përplasi barrierën ndarëse të korsive dhe u përmbys në kahun e kundërt të autostradës.
Mjeti u përplas më pas me një furgon dhe u përfshi nga flakët. Përveç viktimës, dy persona të tjerë pësuan lëndime. Sipas policisë sllovene, shoferi kishte humbur kontrollin mbi autocisternën.