Një aksident trafiku me pasoja fatale ka ndodhur pasditen e së hënës, më 10 gusht, në fshatin Janiqishtë të Malishevës. Në këtë ngjarje janë përfshirë një motoçikletë dhe një veturë e tipit Volkswagen Golf. Sipas informacioneve të bëra të ditura nga Policia e Kosovës, deri te përplasja dyshohet të ketë ardhur kur drejtuesi i motoçikletës, për shkak të pakujdesisë, ka kaluar në korsinë e kundërt të rrugës dhe është përplasur ballë për ballë me veturën civile që drejtohej nga shtetasi Durim Bytyqi.
Pas aksidentit, të dy personat e përfshirë në përplasje janë dërguar për trajtim të nevojshëm mjekësor në Qendrën Klinike Universitare të Kosovës (QKUK). Pavarësisht përpjekjeve të stafit mjekësor, më 11 gusht, rreth orës 01:50, mjeku kujdestar ka njoftuar familjarët dhe organet përkatëse se 30-vjeçari Jetmir Sopi kishte ndërruar jetë si pasojë e plagëve të marra.
Në lidhje me këtë ngjarje, prokurori kujdestar ka urdhëruar dërgimin e trupit të pajetë në Institutin e Mjekësisë Ligjore për kryerjen e obduksionit. Hetimet mbi rrethanat e plota të aksidentit janë duke vazhduar nga organet kompetente.