Një aksident trafiku ka ndodhur sot, rreth orës 13:10, në fshatin Kijevë të Malishevës, përgjatë magjistrales Pejë-Prishtinë. Në këtë ngjarje janë përfshirë tri automjete, duke shkaktuar lëndime te shtatë persona, të cilët janë dërguar për trajtim mjekësor.
Zëdhënësi i Policisë për rajonin e Gjakovës, Sheremet Elezaj, ka deklaruar se, bazuar në informatat e deritanishme, të gjithë të lënduarit janë jashtë rrezikut për jetë. Aktualisht, Njësia Rajonale e Komunikacionit Rrugor është angazhuar në vendin e ngjarjes për të kryer hetimet e nevojshme dhe për të zbardhur shkaqet e aksidentit.
Sipas raportimeve të tjera, drejtori rajonal i Policisë në Gjakovë, Lumni Graishta, ka konfirmuar se njësitet policore ndodhen në vendin e ngjarjes për të administruar situatën. Ndërkohë, bëhet e ditur se tre nga personat e lënduar janë dërguar për trajtim të mëtejshëm në Klinikën Emergjente në QKUK, ndërsa të tjerët kanë marrë ndihmë mjekësore në Qendrën e Mjekësisë Familjare (QMF) në Kijevë.