Ministrja e Shëndetësisë dhe Mirëqenies Sociale, Klodiana Spahiu, vizitoi më 13 tetor Shtëpinë e të Moshuarve në Shkodër, ku u njoh me shërbimet që ofrohen për banorët. Institucioni është pjesë e Shërbimit Social Shtetëror.
Të moshuarit përfitojnë kujdes shëndetësor e social, fizioterapi, shërbime dentare dhe kontrolle periodike. Spahiu theksoi rëndësinë e bashkëpunimit me shërbimet stomatologjike për të përcaktuar nevojat individuale, përfshirë vendosjen e protezave dentare, mbushjet dhe ndërhyrje të tjera të nevojshme.
Ministrja tha se identifikimi i të moshuarve që jetojnë vetëm dhe nuk kanë mbështetje familjare duhet të pasohet nga ndërhyrje konkrete të shërbimeve sociale, në mënyrë që ata të mos mbeten pa përkujdesje. Ajo u shpreh se punonjësit socialë duhet të komunikojnë me shërbimin social përkatës, që personat në nevojë të marrin ndihmën e nevojshme.
Spahiu vuri në dukje se kërkesat për mbështetje sociale janë të shumta dhe lidhen me problematika të ndryshme. Ajo theksoi nevojën për zgjidhje dhe për forcimin e shërbimeve në komunitet. Sipas saj, krahas kujdesit rezidencial, duhen zhvilluar forma të tjera mbështetjeje për të moshuarit që kanë nevojë për përkujdesje, por mund të qëndrojnë në mjedisin e tyre.
Në një deklaratë të publikuar në rrjetet sociale, Spahiu tha se do të vijojë zgjerimi i aksesit në shërbime cilësore, nga depistimi dhe ndjekja shëndetësore te kujdesi social dhe mbështetja e përditshme, sa më pranë nevojave të qytetarëve të moshës së tretë.
Shtëpia e të Moshuarve në Shkodër ofron shërbime rezidenciale që prej vitit 1994. Në vitin 2018 iu nënshtrua rikonstruksionit, me synimin për të krijuar kushte më të mira dhe bashkëkohore për përkujdesjen ndaj të moshuarve.