Prokuroria e Posaçme ka dërguar në Gjykatën e Posaçme të Shkallës së Parë kërkesën për gjykim të procedimit penal nr. 184/3 të vitit 2024, duke finalizuar një prej dosjeve më të rëndësishme për trafikun ndërkombëtar të narkotikëve. Hetimet zbuluan se grupi kriminal ka trafikuar gjithsej 8,126 kilogramë lëndë narkotike, të ndara në 7,261 kg kokainë, 590 kg hashash dhe 275 kg kanabis.
Sipas organit të akuzës, lënda narkotike transportohej nga shtete si Brazili, Ekuadori, Kolumbia, Spanja dhe Maroku, për t'u shpërndarë më pas në tregjet e Italisë, Belgjikës, Holandës dhe vendeve të tjera evropiane. Rrjeti operonte përmes një strukture hierarkike, ku si drejtues të grupit akuzohen Artur Hoxhosmani, Genti Nderjaku (alias Kili/Ekil) dhe Nazmi Shahini (alias Drazhi).
Në listën e 15 të pandehurve që do të përballen me drejtësinë përfshihen gjithashtu:
• Devid Patrut (alias Devid Boraj, Elidon Skëndaj, Fatmir Pepaj)
• Ermir Ndreaj
• Erion Alibej (alias Dylgjeri, Andrea Dylgjeri)
• Klevis Hoxhosmani
• Ramazan Rraja
• Plaurent Dervishaj
• Amar (Dritan) Shkëmbi
• Amer (Ilir) Lloshi
• Julian Meçaj
• Bledar Polovina
• Bashkim Haxhija
• Endrit Sinani
Të pandehurit përballen me akuza për "trafikim të lëndëve narkotike", "grup i strukturuar kriminal", "mbajtje pa leje të armëve dhe municioneve", si dhe "futje e sendeve të ndaluara në institucionet e vuajtjes së dënimit". Operacioni për çmontimin e këtij rrjeti u ndërmor më 25 korrik 2025.
Përditësime
Prokuroria e Posaçme (SPAK) ka dërguar për gjykim dosjen për 15 të pandehur të përfshirë në trafik ndërkombëtar droge. Hetimet janë bazuar në provat e siguruara nga komunikimet e koduara në aplikacionin 'Sky ECC' dhe bashkëpunimin me autoritetet e 8 shteteve (Francë, Spanjë, Belgjikë, Britani e Madhe, Holandë, Brazil, Itali dhe Ekuador). Në dokument është bërë individualizimi i përgjegjësive penale, duke identifikuar rolet si financues dhe pjesëmarrës direktë. Në të njëjtën kohë, SPAK ka pushuar procedimin për Ilir Lloshin, Julian Pjetrin dhe një pjesë të akuzave ndaj Devid Patrutit, në zbatim të parimit ligjor 'ne bis in idem'.