Prokuroria e Posaçme kundër Korrupsionit dhe Krimit të Organizuar ka dorëzuar në gjykatë dosjen hetimore lidhur me vrasjen e tregtarit Besnik Hida, ngjarje e ndodhur më 1 tetor 2019 në lagjen "Skënder Libohova" në Lushnjë. Si i pandehur për bashkëpunim në këtë vrasje është dërguar Ardjan Ahmetaj, i cili aktualisht ndodhet në burg në Greqi.
Sipas hetimeve, Ardjan Ahmetaj dyshohet se ka pasur rolin e ndihmësit në ekzekutimin e kryer me armë zjarri. Autorët e drejtpërdrejtë, të cilët përdorën një automjet të grabitur në Tiranë, mbeten të paidentifikuar për shkak se kanë qenë të maskuar. Në të njëjtin vendim, SPAK ka kërkuar pushimin e çështjes për Laert Haxhiun dhe Orgest Bilbilin, pasi nuk u arrit të siguroheshin prova të mjaftueshme që të lidhnin ata me këtë krim.
Besnik Hida ishte daja i Zamir Latifit, viktimë e ngjarjes së vitit 2017 të njohur si "masakra e Lushnjës". Për atë masakër, Laert Haxhiu, Anterio Kaloshi dhe Orgest Bilbili janë dënuar më parë me burgim të përjetshëm. Ardjan Ahmetaj, përveç procedimeve në Shqipëri, është duke vuajtur në shtetin grek një dënim me 11 vite burg për veprën penale të armëmbajtjes pa leje.