Prokuroria e Posaçme kundër Korrupsionit dhe Krimit të Organizuar (SPAK) ka lexuar konkluzionet përfundimtare në procesin gjyqësor ndaj Zyra Islamaj, ish-kryetares së komanduar të Bashkisë Tropojë, dhe ndërtuesit Rrok Gega. Prokurori Bledar Maksuti kërkoi dënimin me 3 vite burg për Islamaj, me kushtin e konvertimit në 4 vite shërbim prove, dhe 1 vit burg për Gega, me konvertim në 2 vite shërbim prove.
Islamaj akuzohet për veprën penale të "korrupsionit pasiv të personave që ushtrojnë funksione publike", ndërsa Gega për "korrupsion aktiv të personave privatë". Çështja lidhet me një tender për ndërtimin e një ure në fshatin Luzhë të Tropojës, pranë shtëpisë së motrës së Islamaj. Sipas SPAK-ut, Islamaj ka abuzuar me detyrën duke kërkuar nga Gega ndërtimin e kësaj ure, e cila nuk ishte parashikuar në tender, dhe ka angazhuar në ndihmë teknikun e mirëmbajtjes së rrugëve në bashki. Ura nuk u ndërtua.
Kallëzimi penal erdhi nga deputetët e Partisë Demokratike Bardhi, Hoti, Mziu dhe Nallbati. Gjatë seancës, Islamaj kërkoi pafajësi duke argumentuar se çështja është politike. Aktualisht, në Gjykatën e Posaçme Kundër Korrupsionit dhe Krimit të Organizuar (GJKKO) po zhvillohet mbrojtja e të pandehurve.
Trupa gjykuese pritet të marrë vendimin përfundimtar mbi kërkesat e SPAK-ut. Çdo person presumohet i pafajshëm deri në vendim gjyqësor të formës së prerë.