Prokuroria e Posaçme kundër Korrupsionit dhe Krimit të Organizuar ka vendosur zgjatjen me 3 muaj të afateve hetimore për ish-zv.kryeministren dhe ish-ministren e Infrastrukturës, Belinda Balluku. Vendimi pritet t’u komunikohet palëve ditën e mërkurë, datë në të cilën janë thirrur për t’u paraqitur në ambientet e SPAK edhe ish-drejtori i KESH, Erald Elezi, si dhe ish-drejtori i Përgjithshëm i Autoritetit Rrugor Shqiptar, Gentian Gjyli.
Sipas dokumenteve të institucionit, zgjatja vlerësohet e nevojshme për shkak të natyrës komplekse të çështjes, e cila përfshin një numër të lartë tenderash që po i nënshtrohen verifikimit. Belinda Balluku është e pandehur për shkelje të barazisë në tendera lidhur me ndërtimin e tunelit të Llogarasë dhe shtatë raste të procedurave të prokurimit për Unazën e Madhe të Tiranës. Hetimet janë zgjeruar gjithashtu për dyshimet për korrupsion pasiv dhe pastrim parash.
Në qershor të vitit 2026, GJKKO miratoi kërkesën e SPAK për sekuestrimin e një vile dykatëshe në resortin “White Rocks” në Dhërmi, e cila dyshohet si pasuri e fshehur e përfituar në mënyrë të kundërligjshme gjatë kohës kur Balluku drejtonte Albcontrol. Aktualisht, ndaj ish-ministres janë në fuqi masat e sigurimit për ndalim të daljes jashtë vendit dhe pezullim nga ushtrimi i funksioneve publike.
Kujtojmë se në mars të vitit 2026, Kuvendi i Shqipërisë, me votat e mazhorancës qeverisëse, rrëzoi kërkesën e SPAK për autorizimin e arrestimit të Belinda Ballukut. Prokuroria ende nuk ka njoftuar një vendim nëse do t'i drejtohet sërish Kuvendit me një kërkesë të re për këtë çështje.
Përditësime
Prokuroria e Posaçme (SPAK) ka zgjatur me tre muaj hetimet ndaj zv.kryeministres Belinda Balluku për periudhën kur drejtonte institucionin Albcontrol. Prokurori Dritan Prençi ka zgjeruar hetimet mbi procedurat e tenderit për rikonstruksionin e godinës teknologjike, ku fondi limit prej 88 milionë lekësh u rrit me një shtesë prej 14 milionë lekësh. Njëkohësisht, Gjykata e Lartë ka rrëzuar rekursin e saj, duke lënë në fuqi masat e sigurimit: pezullimin nga detyra dhe ndalimin e daljes jashtë vendit.