Kombëtarja e Spanjës është bërë finalistja e parë e Kupës së Botës, pasi mposhti Francën me rezultatin 2-0 në ndeshjen gjysmëfinale të zhvilluar në Dallas. Skuadra iberike dominoi takimin, duke siguruar triumfin falë golave të Mikel Oyarzabal nga penalltia dhe Pedro Porro. Kjo fitore i dërgon spanjollët në finalen e dytë në historinë e tyre në këtë kompeticion.
Nga ana tjetër, përfaqësuesja franceze u kritikua për lojën e dobët. Në qendër të kritikave u vendos mesfushori Michael Olise, i cili, megjithëse ka regjistruar 5 asiste në 6 ndeshje, nuk arriti të përsëriste performancat e mëparshme në gjysmëfinale.
Gazetari i njohur i mediumit RMC, Daniel Riolo, shprehu pakënaqësinë e tij lidhur me krahasimet e bëra së fundmi për Olise dhe Kylian Mbappe me legjenda si Zinedine Zidane e Michel Platini. "Ne po e vendosnim Olise në tavolinë me Zidanen dhe Platinin, kurse ai ende nuk është as në kuzhinë", deklaroi Riolo.
Sipas raportimeve të RMC, Olise nuk arriti të kryente asnjë driblim gjatë takimit dhe humbi një numër të lartë topash nën presionin e mesfushës spanjolle. Për shkak të formës së dobët, trajneri Didier Deschamps vendosi ta zëvendësonte në minutën e 72-të me lojtarin Rayan Cherki. Pavarësisht kësaj ndeshjeje, 24-vjeçari mbetet një prej talenteve më të spikatura, me një sezon mbresëlënës te Bayern Munich, ku regjistroi 22 gola dhe 31 asiste në 52 paraqitje.