Spanja po përballet me një situatë kritike nga zjarret pyjore që kanë përfshirë pjesën qendrore dhe verilindore të vendit. Dy vatrat kryesore, në rajonin e Guadalajarës dhe atë të Zaragozës, kanë shkaktuar dëme të mëdha mjedisore, duke shkrumbuar një sipërfaqe prej rreth 280 mijë hektarësh.
Në zonën e Guadalajarës, flakët po përhapen në parkun natyror Sierra Norte, duke detyruar qindra banorë të largohen nga shtëpitë e tyre për arsye sigurie. Në operacionet e shuarjes janë angazhuar rreth 350 zjarrfikës dhe efektivë të Njësisë Ushtarake të Emergjencave (UME), të cilët mbështeten nga 25 mjete ajrore, përfshirë avionë dhe helikopterë. Autoritetet e Castilla-La Mancha e kanë cilësuar situatën si tejet sfiduese për shkak të kushteve atmosferike të pafavorshme.
Paralelisht, zjarri në afërsi të Zaragozës vijon të mbetet jashtë kontrollit. Sipas të dhënave të autoriteteve të Aragonës, kjo vatër ka përpirë rreth 160 mijë hektarë tokë. Përpjekjet për lokalizimin e flakëve janë vështirësuar nga temperaturat ekstreme, të cilat shpesh kalojnë 40 gradë Celsius, si dhe nga erërat e forta që favorizojnë përhapjen e zjarrit.
Megjithëse nuk janë raportuar viktima nga këto dy vatra, autoritetet kanë shprehur shqetësim për dëmet në habitatet e specieve të rrezikuara, si shqiponjat dhe ujqërit. Kjo situatë vjen pas një ngjarjeje tragjike në Andaluzi, ku më 9 korrik, një zjarr i madh shkaktoi vdekjen e 13 personave dhe shkatërroi rreth 70 mijë hektarë.
Sipas të dhënave të Sistemit Evropian të Informacionit për Zjarret në Pyje (EFFIS), sezoni i zjarreve të vitit 2026 po rezulton ndër më të rëndët për Spanjën.
Përditësime
Shërbimet Infocam kanë urdhëruar evakuimin urgjent të 1200 banorëve në provincën e Guadalajarës si pasojë e përhapjes së zjarreve. Ekipet e shpëtimit kanë lokalizuar një vatër të re aktive pranë fshatit La Mierla, ndërsa Agjencia Shtetërore e Meteorologjisë parashikon një valë të re të nxehti që pritet të vështirësojë operacionet e shuarjes në ditët në vijim.
Hetuesit kanë lokalizuar burimin e zjarrit në fshatin Mierla, në rajonin e Guadalajarës. Sipas autoriteteve, flakët kanë shkrumbuar gjithsej 260 mijë hektarë tokë në afërsi të Madridit. Agjencia Infocam po vijon operacionet intensive për vënien e zjarrit nën kontroll.
Autoritetet spanjolle raportuan një vatër të re zjarri me përmasa të mëdha në provincën e Huelvës, konkretisht në zonën e Niebla-s. Flakët kanë prekur rreth 20 mijë hektarë brenda perimetrit të sigurisë. Operacioni i shuarjes po kryhet nga 600 zjarrfikës dhe 26 mjete ajrore. Evakuimi i popullsisë është shtrirë në 800 persona, përfshirë 300 banorë të El Madroño-s.