Kryeministri spanjoll Pedro Sánchez ka njoftuar masa të reja për rregullimin e platformave të rrjeteve sociale dhe forcimin e mbrojtjes së të miturve. Në një video mesazh të shpërndarë mbrëmë vonë në platformën X, ai theksoi se hapësirat digjitale kanë lehtësuar veprimtari kriminale, dezinformim dhe përmbajtje të dëmshme.
Sánchez deklaroi se zhvillimet e fundit shënojnë një moment të paprecedentë për demokracinë spanjolle. «Këtë javë ka ndodhur diçka e paprecedentë në historinë e demokracive tona. Një oligark teknologjik ka depërtuar në telefonat e miliona qytetarëve spanjoll për t’u thënë se çfarë të mendojnë. Ky është një shembull serioz i abuzimeve të ndërhyrjes që ne po përpiqemi të luftojmë», tha ai.
Ai përshkroi rrjetet sociale si «një lloj Perëndimi i Egër në një shtet të dështuar», ku aplikacionet ofrojnë strehë për mijëra kanale të përkushtuara ndaj pornografisë, dhunës dhe përmbajtjeve të tjera kriminale. Gjithashtu, Sánchez theksoi keqpërdorimin e inteligjencës artificiale për krijimin e imazheve të rreme nudo, madje të të miturve, përgjim, vjedhje të dhënash dhe amplifikim të urrejtjes.
Qeveria spanjolle ka nisur pesë masa për mbrojtjen e të miturve dhe dhënien fund të pandëshkueshmërisë digjitale:
- Bashkëpunim me Prokurorinë Publike për hetimin e krimeve në rrjetet sociale;
- Ndjekje penale e manipulimit të algoritmeve që përdorin të dhëna personale pa pëlqim;
- Ngritje e akuzave penale ndaj kompanive që refuzojnë të heqin përmbajtje të paligjshme;
- Krijim i bazës së parë të të dhënave për urrejtjen dhe polarizimin;
- Kufizim i qasjes në platforma për personat nën moshën 16-vjeç.
Këto masa synojnë forcimin e rregullimit digjital në Spanjë.
Përditësime
Kryeministri spanjoll Pedro Sánchez deklaroi: «Ne e dimë se kjo elitë teknologjike ka më shumë para dhe madje më shumë pushtet se shumë shtete».