Pas një hetimi të nisur në maj të vitit 2024, Komisioni Evropian ka paraqitur gjetje paraprake ku deklaron se platformat Facebook dhe Instagram janë dizajnuar në mënyrë të tillë që të shkaktojnë varësi te përdoruesit. Sipas autoriteteve të Bashkimit Evropian, mekanizmat si videot që nisin automatikisht, shfletimi i pafund i postimeve dhe algoritmet e rekomandimeve e vendosin trurin në një gjendje "pilotimi automatik", duke nxitur sjellje kompulsive.
Brukseli thekson se Meta nuk ka vlerësuar siç duhet rreziqet për shëndetin mendor dhe fizik të të miturve, ndërsa mjetet ekzistuese për kontrollin prindëror dhe kufizimin e kohës janë cilësuar si joefektive ose tepër të ndërlikuara për t'u zbatuar. Në përputhje me Aktin e Shërbimeve Dixhitale (DSA), autoritetet evropiane i kanë kërkuar kompanisë të ndryshojë filozofinë e dizajnit dhe të çaktivizojë funksionet që nxisin angazhimin ekstrem.
Nga ana tjetër, Meta ka kundërshtuar këto konkluzione, duke argumentuar se hetimi nuk pasqyron masat e ndërmarra tashmë për mbrojtjen e të rinjve. Zëdhënësit e kompanisë kanë përmendur prezantimin e "llogarive të adoleshentëve", të cilat ofrojnë mundësi për bllokimin e aksesit gjatë natës dhe kufizimin e kohës ditore të përdorimit. Kompania ka shprehur gatishmërinë për të vazhduar bashkëpunimin me autoritetet.
Nëse shkeljet konfirmohen dhe kërkesat e BE-së nuk zbatohen, Meta përballet me sanksione financiare të rënda. Gjobat mund të arrijnë deri në 6% të xhiros vjetore të kompanisë, shumë kjo që mund të kapërcejë vlerën e 12 miliardë eurove.